Atawi

Bas: "Pa, dupi murangkalih sarakola di mana?"

Réspondén: "Alhamdulillah, nu ageung tos SMP, nu alit mah SD kénéh"

Bas: "Harepan Bapa ka murangkalih Bapa kumaha, naha hoyong tiasa sakola luhur atawi kumaha?"

Kuring nyiku leungeun Bas lalaunan. Manéhna ngarérét, tapi kawas nu teu maliré, mulangkeun deui paneuteupna ka Réspondén. Semu panasaraneun pisan, teu sabar kana kana jawaban.

Réspondén: "Tangtos atuh, Cep, sepuh mah hoyong murangkalih téh tiasa sakola luhur."

Bas: "Taaah, pami Bapa, hoyong murangkalih téh sami jiga Bapak tiasa miara domba, atawi... kumaha?”

Kuring nyiku leungeun Bas deui, nu ieu mah leuwih tarik, bari rada molotot. Tapi angger teu dipaliré. Satuluyna… bla bla bla bla…, bari loba 'atawi' di antarana. Isarah kuring tetep teu dipaliré.

Bérés. Amitan ka Réspondén. Bas séwot. Pokna: "Ari Ikaaa, kunaon, sih? Ti tatadi ngan nyikuan waeee?"

Disabaran. Kuring ngajawab: "Maksud 'atawi' téh naon, sih?"

Partner téh nyureng, pokna: "Nya..., maksudnya... 'atawa', tapi lemesnaaa!"

Kuring mésem, tetep kalem, nanya deui ka manéhna: "Ari lemesna 'atawa' téh sanés 'atanapi'…?”

Bas ngahuleng. Lalaunan nanya bari témbong teu yakin: "Enya…, nya, Ka?"

Kuring : "Muhuuun, Akaaang!"

Puas pisan ngajawab téh. Giliran manéhna nu nyéréngéh kapiasem. Ari Akang!

(Carita sapotong tina memori kunjungan SosPed di Bayongbong. Diserat ku Ceu Ika dina Basa Sunda, diropéa ku @yoezka)

Adu Domba Garut di tahun 1921 (foto: tropenmuseum/wikipedia)